Í síðustu viku var Maísól heima með mér og langaði hana ekkert meira en að mála. Hún er sjúk í að lita og mála en því miður áttum við enga málningu. Ég fór á google og athugaði hvort það væri mikið mál að búa til einhverskonar heimagerða málningu og það virtist vera ekkert mál.
Það voru nokkur hráefni í þetta og tók bókstafleg nokkrar mínútur að búa slíka málningu til. Þessi málning hentar vel börnum þar sem öll hráefnin í málninguna er til matargerðar. Ekki að Maísól sé ennþá mikið að setja upp í sig en þá hentar þetta kannski yngri börnum líka.
Það sem þarf :
1 dl hveiti
2 dl vatn
Smá salt
Matarlitur
Aðferð :
Hveiti og vatni blandað saman í pott og hrært þangað til ákveðin leðja/deig verður til.
Saltinu hrært síðan við þegar blandan er tilbúin.
Smá af köldu vatni bætt út í og hrært þangað til áferðin verður eins og málning.
Blöndunni skipt í nokkrar skálar og mismunandi matarlitir settir í skálarnar til að fá liti.
Haustlitirnir voru svo fallegir svo við drifum okkur út í að tína nokkur laufblöð sem ég ætlaði að líma á blaðið hjá henni en endaði síðan í allt öðru föndri. Maísól byrjaði að vilja bara mála laufblöðin sjálf og sulla með það. Ég leyfði henni að maka eins mikið af öllum litum og magni á eitt risa stórt laufblað og stimpluðum svo á hreint blað. Það kom mikið betur út en ég átti von á enda vakti það mikla lukku á meðal fylgjenda.
