Ég elska einfaldar og fljótlegar uppskriftir en kókoskúlurnar eru einmitt eitt það auðveldasta í bakstri. Það þarf ekki einu sinni að bíða eftir þeim í ofni sem er snilld! 😀 Mér finnst kúlurnar alltaf vera vinsælar þegar þær eru á boðstólnum en ég geri þær nú oftast bara fyrir sjálfan mig.
Það sem þarf :
2 tappar vanilludropar/vanillusykur
1 1/2 dl Kókosmjöl
3 dl Haframjöl
100 gr. Smjör
2 msk. Kakó
2 msk. Vatn
1 dl Sykur
Öllu er blandað saman í skál og hnoðað vel saman.
Búið til litlar kúlur, ca einn munnbiti, því minni því betri að mínu mati 🙂
Rúllið kúlunum upp úr kókosmjöli.
Gott er að setja kúlurnar í kæli í smá stund áður en þær eru borðaðar en það er ekki nauðsynlegt.
En best að geyma þær í kæli.
Einnig er hægt að minnka sykurinn, sleppa honum alveg eða nota stevíu.
Þegar ég leyfi Maísól að hjálpa mér að baka kúlurnar hef ég sleppt sykrinum alveg og bætt aðeins meira af vanilludropum og hefur það alls ekki verið verra.
Það er ótrúlega gamana að leyfa krökkunum að taka þátt í eldhúsinu og finnst mér þá þessi uppskrift brilljant þar sem hún tekur stuttan tíma, hún getur hjálpað mér og engin bið eftir bakstri ! 🙂
